Macau Ponte 16 酒店自閉之旅

尋日Mommy因為病去左急症室睇醫生，雖然話暫無大礙可以出院，但我都仲係好唔放心~雖然兩個禮拜前已經book好酒店，但今朝出發前仲15/16緊好唔好過去玩，mommy一句：「澳門同香港咁近，有乜大吉利是我再唔舒服打比你，你都好快番到來啫，book左酒店就唔好徙喇！」

所以，今次係有史以來玩得最冇癮、最心不在焉既一次~冇乜心情出去行，只係呢埋o係酒店「hea」下就算~

講番今次間酒店，係Sofitel集團旗下既「Ponte 16」(16浦渡假村)，話新唔新、話舊又唔舊；話大唔大、話好豪又唔係，定位同賣點都唔係太清晰~酒店website簡直係「O」info，搵張房間既相睇下都冇，唯有去Agoda「目及」「目及」間野係點樣既先~

「hea」爆之旅連出發時間都「hea」過人，3pm先搭TurboJet由信德中心出發去澳門~ 預先online登記左TurboJet HKD $180往返港澳優惠，所以此行既船票洗費慳左好多！

o係口岸碼頭搭shuttle去到酒店差唔多4:30pm，以為好快可以攞到房，點知要排長隊等check-in，去咁多次旅行真係第一次見！

酒店外貌~

酒店Lobby~

 

我地今次入住既係Executive Room既客房，位處17/F，係最高既住客樓層。一出lift就見到有個counter，係Club Sofitel Lounge既counter，隔離就係lounge既relaxation area，都幾靚！

入住行政客房既住客可以享用club lounge既設施，如免費上網、小食、飲料等~

而酒店check-out時間雖然列明為11am，但我地第二朝打電話去front desk問可唔可以12pm先check-out，佢地都話冇問題，幾易話為~

走廊、floor lobby都裝修得幾hip~ 我地今晚下榻Rm 1713~

講真，房間唔算大，比我想像中細，但勝在樓底夠高，嬴番少少分數喇！床唔算好大，正常酒店double bed size，每樣野都好standard，冇乜特別~

反而bathroom就有d驚喜！雖然唔係jacuzzi tub，但bath tub有得邊浸邊睇電視，仲有remote比你選台同控制浴簾升降，算係幾high-tech~

另外，沐浴用品選用名牌L'Occitane，又加左d分！仲有，最貼心既係有浴棉同第一次見既bath pillow，可以枕住個頭浸浴，好正！

房內日用品都好齊全，有熨鬥+熨板、safety lock、DVD機，仲有個???係用來掛褸同呔既架~

最surprise係個view，望出去係河景，都幾開揚~哈哈，但當然冇得同我地屋企個海景view比喇！

望落d係酒店泳池，唔算好大，但好多泳客！雖然我地有帶備泳衣來，但最後都係選擇唔落水，因為個池實在好多國內同胞~ 你地知道喇，佢地有幾乾淨架喇，我唔想浸o係一個充滿尿液既池裏面囉！

夜晚望落樓下泳池都幾靚，會有花型pattern夜燈，幾好feel~

Sofitel Ponte 16既賣點係「My Bed」service，即係有7種唔同種類既枕頭比客人選擇~

夜晚打電話去Housekeeping要求一個薰衣草枕 + 護頸睡枕，要成20mins先送到來，職員解釋話係要搵下有冇存貨......下?！乜唔係有大量存貨供客人選擇架咩?！要「抄」咁耐先有！

酒店weekend有free shuttle bus來往旅遊熱點，但班次疏、座位少，形同虛設，好過冇咁喇~

Settle down後我地就搭lift落去2/F睇酒店最大既賣點 -- Michael Jackson Gallery~

(Opening hour : 12pm - 8pm，免費入場)

睇雜誌廣告以為個場好大、好多野睇添，點知可以用十萬個失望來形容！

場地大而不多展品，企圖用大量既TV播music video來增加視覺豐富感，錯哂！

影相位唔多，極其量係入口既燈柱同縮景建築物~

寥寥可數既展品~

酒店1/F仲有MJ Cafe，又係借MJ之名「掛MJ頭、賣狗肉」既餐廳~

酒店只有兩間餐廳同一間cafe，見6/F間Mistral Restaurant做緊MOP $288 dinner buffet promotion，環境都幾grand幾靚，所以初時都想今晚餐飯o係度搞掂算~

點知餐廳職員話今晚full booking，如果想食既話，就要坐酒吧區既位置~ 拎野食又唔方便，又多人爭食，都係算罷喇，自己出去搵食都冇咁嬲~

我地冇帶任何澳門遊天書，又冇帶netbook o係身，所以唯有周圍行，睇下邊度有葡國餐廳~

老實講，我係極度抗拒去議事亭附近既餐廳「搵食」，果度d餐廳如「九如坊」都係又貴又呃遊客錢既，試過一次就怕怕了！

行左大半個鐘，終於o係唔知邊條街見到有兩間葡國餐廳，一間係「內港餐廳」，另一間係「海灣餐廳」。最後我地揀左門外裝修比較靚既「內港餐廳」開飯，下次來可以試下隔離間「海灣」~

我地冇預先訂檯，入到去見到都幾爆場，好彩o係樓上仲有兩檯有位剩。但樓上都幾嘈，可能係面積細，d聲困住哂好應聲，隔離檯鬼婆大聲d講野，已經覺得好刺耳~

先來支mini Perrier(MOP $20)同Iced Choc(MOP $25)，以餐廳價來講，真係算好抵！

餐包係送既，但好難食，咬左兩啖就冇要~我點左個紅豆雜菜湯(MOP $30)，都幾多料，但飲得出係有加味精既~

另外點左個葡式烤臘腸(MOP $55)，話就話係臘腸，但同我地中式既味道完全唔同，係將西方既肉腸切片再烤熟佢~ 呢個味道唔錯，但又唔可以話好好味~

再來既係葡式焗鴨飯(左上)，呢個真係好好味！超正，入面有好多鴨肉，好香！

另外仲order左半隻非洲雞(MOP $90)(右上)，有少少辣，都幾開胃，但齋食冇飯送就好似太濃味~

食完正餐就order甜品，Jay話好飽，order左個Vanilla ice-cream就算(MOP $20)。點知上檯見到個single scoop ice-cream，真係好想大嗌「回水」囉！有冇搞錯呀，20蚊得一個球，少少伴碟生果都冇，呃唔呃錢d呀！

我個甜品係焗蘋果(MOP $25)，差果5蚊，但正常好多，味道仲唔錯添~

食完飯o係樓下賭場玩左兩手，嬴左$100 only，哈哈，好過冇喇！跟住就o係房睇「獎門人」、「超級巨聲」打發時間就算~

第二朝訓到11點幾先起身，check-out後就搭船番香港，因為Jay仲要番半晏~ 就係咁結束左我地2D1N既酒店自閉之旅！