Bangkok 為食之旅 (Day 2 - Part D)

o係「dvn」食完tea後，我地去左附近既「NaRaYa」shopping，買左d布藝手信，然後就去食晚餐喇！哈哈，我地呢個trip唔係食就係訓，想唔肥都幾難！

我地今晚就係o係呢間「Baan Saranrome Thai Restaurant」食泰菜喇~

「Baan Saranrome Thai Restaurant」前身係上世紀泰皇既居所，用左好多泰國加歐洲宮廷既設計，以金色同白色為主色，極盡奢華~

Address：10/8-10 Sukhumvit Soi 39, Sukhumvit Road, Klongton, Wattana (BTS Phrom Phong站Exit 3出，步行約5分鐘)

一入去見到呢度既裝潢咁豪華，我地都忍唔住「哇」左出來！

而家係晚飯時間，但餐廳裏面既人客唔算多，都係以遊客為主。有d擔心唔通呢度既食物質素唔掂，所以冇乜當地人來幫襯?！

餐廳樓高兩層，由於人客唔多，所以樓上雅座暫時未開放，我地只可以o係樓下用餐~

餐廳中央既大型水晶吊燈~

餐廳有好多雕花壁畫，感覺好grand呢！

餐廳裏面亦有唔少既泰式工藝擺設~

我嗌左個椰青飲，味道好清甜架！

極度推介呢個「椰子冬蔭功湯」！我同Cyrus超鍾意呢個湯，係我地呢次行程中試過最「得 」既冬蔭功湯~

用椰青裝住2人份量既冬蔭功湯，除左湯本身既酸辣味之外，仲食到椰子既甜味，口感好豐富呀~唔太鍾意食辣既人一定會鍾意！

哇，成碗都係蝦呀，勁足料！！！

泰式炸物，點埋Thai Sauce，好開胃惹味~

另一個Must Eat推介係 -- 「燒豬頸肉」~ 第一次食到入口即溶既豬頸肉咋！！！好好味呀~

我同Cyrus一邊傾偈，一邊夾d豬頸肉食，哈哈，最後差唔多成碟比我食哂！

「泰式煎魚」加左菠蘿、青椒等伴菜，味道酸酸甜甜咁，好開胃~

相對其他野食，呢個「泰式菠蘿炒飯」就味道麻麻喇，略嫌d飯粒炒得唔夠乾身~

我地兩個眼寬肚窄，嗌到成檯都係野食~

今晚d野食真係好好味呀，我地兩個變身成「食物焚化爐」，肥死都唔理架喇，食左先算！

我地總共order左4餸1湯，加埋2個椰青，誠為THB $1111/2 person (~HKD $140/person)，好抵食呀！！！

食飽飽後我地就行上樓上參觀一下~

牆上有好多手工精緻既泰式雕刻壁畫~

o係樓上向下望，好有氣派呢！

連toilet都裝修得咁精緻，皇帝既屋企真係非同凡響呀~

臨走前，餐廳既日籍老闆仲幫我地影左張合照，順便訪問一下我地對呢間餐廳既評價~

我地既答案係 -- Excellent！

我地實在食得太crazy喇，番酒店之後突然「良心發現」，決定去酒店樓下既swimming pool「勞動」一下！但又唔敢直接著住套3點式去「遊lift河」喎，於是換左酒店衣柜裏面果套超大碼睡衣，個造型好搞笑囉~

哈哈，結果係...... 我地以呢身打扮去到樓下，發覺其他住客係咁望住我地，當正我地係黐線一樣，我地即刻「打道回府」算罷喇！

我地個「騎尼」睡衣look~