Phuket潛水hea遊之旅 (Day 1)

今次雖然唔係第一次去外地潛水，但就係玩得最開心既一次！雖然最後只係離遠見到Mr. Black Tip Shark，見唔到海龜先生同Manta小姐，但可以見到如此美麗、無污染既海底世界，真係不枉此行！

出發當日由Arthur做柴可夫渣車送Cyrus去機場，哈哈，我可以順路搭順風車！早成個幾鐘去到機場，7:25pm先boarding，所以o係T2 check-in後就去樓上既越南餐廳開餐~

Jay都好乖，放工後搭車入來送我機~

唔知班機去到果邊咁夜仲有冇錢唱，所以個rate蝕d(HKD $1 = THB $3.817)都要o係香港機場換定少少過去，換左HKD $398.2 --> THB $1520頂住檔先！去到見rate靚再慢慢唱~

我同Cyrus細個o係機場做過summer job，超熟路，諗住7:25pm Boarding (7:35pm close gate)，食到7:20pm先起行都趕得切啦！

點知T2 d counters同過關工作人員比T1少好多，淨係排隊過關、X-ray都搞左成25分鐘，再轉兩程無人駕駛去到閘口已經7:55pm！架機開8:05pm架，過關途中超驚，驚架機閂閘走人唔等我地......一出無人駕駛就即刻好似傻婆咁奔跑......

跑到上左扶手電梯，有個地勤捉住我地問：「係咪Air Asia去Phuket架?！」跟住就叫我地快跑，因為淨番我地兩個未上機，個職員仲o係對講機話：「撈到啦！係2個女仔，而家跑緊過來，唔好閂閘住！」

一上機，成機人o係咁望住我地，超embarass囉......後來同機既網友話番比我地聽，機長用mic問過幾次有冇我地兩條「蛋散」o係機上...... 樣衰到爆呀！

Photo taken by my new toy "Lensbaby"~

Cyrus仲笑得出，真係服左佢~

驚暈未定，抖大氣中......

空姐o係我地隔離示範點著救生衣~

拎支新買既lensbaby試下鏡先~

奔跑一輪超口乾，局住要買支綠茶飲，誠為THB $50~

要留意既係for international flight，航機只會接受出發地/目的地既貨幣or USD，而找錢就淨係會找泰幣，仲要唔收coins，只收紙幣~

落機時間係當地10:45pm，o係網上已經pair up左一對macau couples一齊租taxi去Patong Beach，一來慳錢，二來有個男人傍住，我地都冇咁驚~

但出閘後發現最近果兩間currency exchange都已經閂左，冇得唱錢！好在Cyrus有之前用剩既泰幣o係身啫~

o係網上check過搭Taxi去Patong Beach 大約THB $550，但由於15/11先係Air Asia Phuket線首航，我地就係第二班試搭呢條航線既乘客，基本上d網友都唔係好知道夜機既價錢~

出閘後已經有好多司機主動來approach我地，問我地去邊、住邊間酒店，跟住就開價比我地~ 不過唔知係夜班Taxi貴丫，定係佢地以為我地唔識野，日頭只需THB $550去Patong Beach既正常價，去到夜晚竟然狼死到變左THB $750-$1000不等！真係唔好去搶！

嘗試過同佢地講價，但佢地好似唔休做咁唔show我地，企得好硬！

最後搵到架大車，本來開價THB $1150，但見開始夜，諗住做埋呢轉收檔，就益我地THB $750出車，呢個價錢坐大車，個心都「gur」番d~架7人車好新淨，又闊落，裏面仲有mini-LCD TV介紹Phuket既名勝添，算係咁啦~

開車無耐，個司機就車左我地去佢間公司話要去拎d野，等佢果幾分鐘其間有位職員好有禮貌咁拎左d local tours catalog比我地睇，原來呢間公司除左租車外，仲有local tours service~

經過40分鐘車程，差不多當地時間12am，就到左澳門Couples入住既Deevana Hotel，佢地首先落車，臨離開前我地仲匆匆交換左聯絡方法，以便幾日後相約再一齊租車去機場~

幾分鐘後就到左我地間酒店「Club Bamboo Hotel」啦！但我地落車時，reception staff見到我地個樣超驚......當我地拎張voucher出來check-in時，佢又搞左好耐都比唔到房我地，淨係識得不停咁叫我地「wait a moment」......搞左幾個字，佢先話比我地聽「Sorry, full booking！」

我頂你個肺丫！我地o係agoda book房，credit card連錢都收埋，點解會冇房full booking呀?!夜麻麻成12點幾，你叫我地兩個女仔去邊度訓呀?！

個職員冇再解釋點解，淨係話會transfer我地去附近另一間叫「Seeka Boutique Resort」既姊妹酒店入住，仲話有車送我地去，唔洗我地再比錢......事到如今，都冇法啦！唯有局去......

其實轉酒店唔係問題，都咁夜啦，我地都係求個地方落腳啫，唯一擔心既係我地出發前已經full-pay book左Liveboard Diving(2日1夜)，仲叫左diving tour既職員聽朝6:30am去「Club Bamboo」接我地，而家突然比人轉左去第二間酒店，都唔知聽日佢地識唔識得去新酒店接我地既?！所以臨行前千叮萬囑「Club Bamboo」個reception聽朝記得帶diving tour個司機去「Seeka」度接我地！但條友個樣「濛盛盛」咁，真係好驚佢唔記得呀！

去到「Seeka」已經成1am，Reception個職員帶左我地去最高果層3/F，呢間野冇lift架，聽朝要我地自己「的」番兩個喼落來都幾係野！

職員開左其中一間房既門，想幫我地搬埋野入去，但我地就聞到間房傳來一陣好臭既味道，再望一望個地板，成地都係塵，好明顯間房好耐都冇人住過......我地當然死都唔肯要呢間房啦！叫佢即刻搵過第二間比我地！！！

點知佢再拎來條key都係o係呢層樓既房......唉，算啦，見新房冇乜臭味，我地就收貨o係度訓半晚喇！

入到間房，第一個感覺好唔舒服，好似有野壓住個心口咁，但講唔出係邊度唔舒服...... 間房唔算細，但就好暗囉......

好唔鍾意牆上果塊鏡，一入房已經覺得望到好唔舒服......

由於入到房個心已經好唔舒服，所以我向Cyrus提議一陣沖涼時大家都唔好閂門，一路傾住偈......

個廁所都係陰陰暗暗咁......牆身仲有d神像雕刻掛畫，但個樣好evil下，I hate looking at them when toileting~

我地夜晚3am左右訓覺，初時好倦超想訓架，但當我就訓著時，就聽到拖鞋聲啦......d聲好似o係附近行來行去咁......我已經叫左自己唔好咁專心聽d聲o係邊來，但個心就不自覺係咁search for the sound......Cyrus訓o係我隔離，見佢訓著左，我都唔敢叫醒佢，廢事到事兩條友眼光光仲驚呀......

成晚我都冇訓過呀，直到5點零鐘雞啼，d聲先開始漸漸冇左......