Phuket潛水hea遊之旅 (準備篇 -- 機票篇)

一早約定好姊妹Cyrus今年11月中攞VL齊齊去旅行，但我而家讀緊degree，年尾要慳錢交學費+交稅，本來諗住呢個假期慳d唔去旅行算喇~但我地兩個實在頂唔順醫院既workload，決定「破地獄」，齊齊過檔去私家！由於去到私家後唔會再咁容易夾到齊齊放VL，所以我地臨時臨急決定呢個VL點都要去旅行玩番夠本！

初時諗住報團去海南島或韓國玩下，但睇完d章程又覺得興趣不大，一來唔鍾意番大陸，二來自己又去過韓國，重復玩同一樣野好似好白癡咁~於是我就去「Cebu Pacific」、「Zuji.com」、「Air Asia」睇下有乜筍價機票~結論係 ---> 冇！！！ 

去台北既機票連稅要$1300，去Cebu既都係差唔多價錢，去Phuket既就$1780。同Cyrus商量過後，決定選擇後者，一來佢未去過(我F.5時跟團去過一次)，二來我地想陽光與海灘hea下~

唉...我地咁遲先決定去旅行，整定係要捱貴機票架喇~今日上晝就扑鎚book左呢張貴價機票喇！Airasia標價去程HKD $807、回程HKD $645，兩程合共HKD $1452，加埋HKD $328既airport tax後，本來每人需付HKD $1780既~但原來仲有好多hidden cost要比架！行李喼(15kg以下)要每程比託運費HKD $24~ 仲有online booking要比「Convenience Fee」HKD $15/程，搞到最後每人淨機票都要HKD $1858~之前Airasia搞promotion，同一條航線，如果係promotional price起碼平一半有多，所以幾時都話「平野趁早」架喇！

P.S.本來仲有「揀位費」，每程HKD $11.6，但我唔想徙錢喇，求其有個位比我地坐就得喇，最多早d check in囉！

訂左由16/11 - 20/11/2009既direct flight機票~時間識真麻麻，屬晚機去、晏晝機返，實質得番3日半玩咋！

16/11就出發，仲有兩個禮拜時間比我地搵酒店，而家努力「格價」中~機票貴左，住就唔可以咁豪喇！目標以HKD $400-500/night既海景酒店為主~