Taipei 老友鬼鬼之旅 (Day 1 - Part B)

士林夜市勁食

回程搭番捷運到「劍潭站」落車，出發去士林夜市「掃街」！

由於我地想用最小錢食到最多既野，所以決定5個人每人出$200台幣做「儲備金」，食乜野就o係果度拎錢出來找數，每人咬幾啖過下口隱~

Yen's BF同我地冇咁熟，冇理由叫人地食我地口水尾架嘛，所以佢同Yen決定「自立門戶」~

我地先沿「文林路」開始掃，一直殺呀、向前殺呀！！！

食左好多好好味既野~

一開始就食「豬血糕」同齋鴨，「豬血糕」味道有d怪，我地一致認為好難食......

 哈哈，你地睇大彬食到嘴都歪埋就知有幾難食啦！

--> 之後就o係「青蛙下蛋」買左杯「檸檬愛玉冰」飲，酸味味幾好味、幾開胃~

但點解呢檔野叫做「青蛙下蛋」?！莫非係因為d檸檬浮o係冰上似青蛙蛋?！

--> o係「馬桶冰」買左杯屎狀既軟雪糕，味道一般，但係個造型夠哂特別~ 哈哈...... 我咁大個女都係第一次「食屎」咋！

--> 買左包「雞蛋糕」食，同我地o係HK食既雞蛋仔唔同，係另一樣野，入面有紅豆溶，幾好味！

--> 行過一檔專賣「果子凍」既檔攤，見到d果子凍五顏六色勁colourful，每粒入面都真材實料有生果肉架！

所以我地都忍唔住買左6隻唔同味來試，味道ok，但係又唔講得上係超級好食~ 不過大熱天時就咁放o係度冇冰雪住，唔多衛生喎！好彩食完冇肚痾咋~

--> 鷓鴣蛋串好好味！！！又香又有咬感~

--> 「涼圓」有d似我地食開既湯圓，不過係凍既，裡面有不同味道既鹹，我地買左哈蜜瓜同紅豆鹹食，煙煙un un幾好味！

--> 「北京烤鴨夾餅」又係勁掂推介！好香、多汁！

哈哈...... 仲有「烤鴨」姐姐身材+樣貌都好掂，搞到大彬顧住睇唔記得食！

--> 熱辣辣、大大個既「胡椒餅」係另一推介~

拎o係手度都勁辣手，一啖咬落去d汁bit哂出來好易會辣親個嘴，所以食「胡椒餅」時不宜太「禽青」！

--> 跟手就買左塊好似塊面咁大既炸雞扒食，比錢時佢會放番落個鑊度番炸，跟手剪到細細舊咁等我地容易d入口。

塊雞扒好味到震，

就好似以前睇「味吉陽一」卡通片咁好味到想飛~

外層脆bo bo，入面d肉質勁滑，肉汁完全鎖住o係雞肉裡面，好味過平時食開果d垃圾KFC好多倍！絕對係MUST EAT ITEM~

--> 「甜不辣」既材料有炸豆腐同白蘿蔔，但係味道係甜既~ 味道ok既，可以一試，不過我就唔係好鍾意食，因為始終覺得個配答有d怪......

--> 「大腸包小腸」又係勁好味！小腸係一條台灣肉腸，而大腸係「假腸」，佢係一條糯米卷，大腸同小腸一啖一齊咬，小腸辣辣地既味配合埋大腸既煙un，簡直係絕配！！！

--> 台灣既臭豆腐同香港既好唔同，雖然佢地聞落都係一樣咁臭，但係佢地會整到細細舊、一啖食一舊既size~ 醬油方面，香港興加甜醬/辣醬，呢度興加d酸味味既汁，食落完全唔覺得自己食緊臭豆腐，似食緊炸豆腐多d，口感幾特別~

--> 我地叫左一客台灣好出名既「蚵仔煎」，但係睇落同食落冇乜特別，有d似我地食開既蕃茄炒蛋，食左一半我地都唔想食......

--> 睇梁望峰本「台北攻略遊蕩」介紹我地去食「大上海生煎包」，幾經辛苦先搵到個檔位！

買左一個菜肉&一個肉包試。chir......

我覺得o係上海食過既RMB $0.8一個既菜肉包/肉包好味過佢好多！！！上海食既真係勁多肉汁，bit到成個膠袋or成手都係架，而且d汁勁鮮甜，真係好懷念上海既$0.8包！！！

--> 「鹽酥菇」係用油炸左既菇菇，我地買左mix favour，有冬菇、金菇同雞脾菇，味道鹹鹹地，食完小心喉嚨痛！

--> 台灣始終係珍珠奶茶係發源地，呢度既珍珠奶茶真係隨街搵間買來飲都比香港既有水準得多！

珍珠勁煙un、有咬感，奶茶不太甜，又香又滑！最重要既係價錢平得來又勁大杯！！！

--> 「木瓜奶」冇乜特別，同香港飲開既差唔多，可以不試！

--> 行經一檔賣涼茶既檔攤，買左杯「洛神茶」同冬瓜茶飲！冬瓜茶味道麻麻，反而「洛神茶」一飲我地就個個都愛上左！

「洛神茶」味道唔似我地飲開既涼茶，味道酸酸甜甜，有d似利賓立，正！

$20台幣(=HKD $5)，抵飲到爛！

--> 我地仲去左梁望峰推介既「辛發亭冰果名店」，呢間野專食泡冰，佢本書講到隻叫「雪山蛻變」既泡冰勁好味，於是我地都叫左一客，另外我地仲叫左「芒果冰」同「烏梅片冰」食。

點知三隻味入面最難食既就係「雪山蛻變」！

係有花生醬味既泡冰！又比梁望峰「扇」左穫添~

最好味、賣相最靚既就係「芒果冰」，d泡冰軟棉棉好似棉花咁，好好味呀！

而「烏梅片冰」既味道都唔錯，酸味味幾開胃，但係我地略嫌d冰粗左d，食落口感冇咁好！