Cebu 碧波盪漾之旅 (Day 4) - Part B

我地今日租車去1 day tour包遊7個景點，包括：Chocolate Hills、Man-made Forest、Hanging Bridge、Loboc River遊船河 (not including the price of boat trip)、Museum de Loboc、睇Tarsier、Church等。

睇完「新世界7大奇蹟」之一既Chocolate Hills後，我地再上車向下一個目的地：Man-made Forest進發~

原本以為個Man-made Forest有幾巴閉，個名懶勁咁，點知司機叔叔渣渣下車突然o係路中心停左，叫我地落車影相......我地頭都大埋，呢個爛鬼樹林有乜好影呀?！佢先話比我地聽，呢度就係Man-made Forest喇！咁既樹林都叫景點?！唔係呀化！

呢度就係個名懶勁既Man-made Forest~

司機叔叔自動請纓話幫我地3個影相，但唔知佢想only影人丫?！定係想影樹幹多?! Cut哂樹頂果部分......

我地自己渣番機影正常好多~哈哈，影到懶綠樹林蔭咁~

「Her」聲四起下，我地又上車向下一個目的地：Hanging Bridge進發~

一落車見到條橋，又係「媽媽聲」！一條爛鬼吊橋又當係景點?！菲律賓當局擺明玩我地班遊客！

吊橋側邊有人哂緊衫，成個feel好唔掂！

條橋d木板又舊又殘，我地唔係好敢行，怕佢會突然斷開成個人跌落河~

唉，司機叔叔既攝影技巧認真唔掂......

請留意，我前面塊板係斷架！好危險呀！

感覺比人搵緊笨既我地，谷住成肚氣上番車！司機叔叔話車我地去下一站：Loboc River，我地可以o係船上食Buffet、睇風景，一定比之前既景點更attractive咁話~

Loboc River有幾間船公司搞river cruise，當中以「Long River Cruise」比較多人選擇，聽講d野比較好食d喎~

收費為Peso $300/person，包buffet lunch和1支汽水，整個行程約1.5小時~

呢個就係船上既Buffet Menu，睇相都ok丫，有肉、有海鮮，仲有Dessert同生果添~

泊船既碼頭，遠睇有d Disneyland feel~

船上既空間都算寬敞，由於遲左上船，我地被安排坐o係船尾既位置，個view相對冇咁靚！建議大家爭船頭位置坐，影相冇人遮住之餘，仲涼爽好多添！

幾時都話，睇相係唔準架喇！Buffet食物既樣係同張相一樣，但味道就...... 魚冇魚味、豬冇豬味...... 都係果句，肚餓既話，乜都食得落！

Salad、甜品(白色一舊舊果d糕)同生果睇落比較ok，但都唔好得去邊，好多烏蠅「嬲」來「嬲」去，我部機影唔到咋！

最正常既要算支汽水喇！真係Sprite同Coca Cola~ 但Sorry呀，想飲邊隻味係冇得揀，佢求其執比你~

「唔怕痾敢死隊」來喇！你睇我地拎左幾多野食番黎~ 加送飯後果香蕉兩隻！點解揀蕉食?！因為有皮包住，唔怕食d烏蠅口水尾丫嘛~

船上氣氛其實幾好架！有個賓佬o係度自彈自唱娛樂大家，可惜除左我地幾個，冇乜人show佢~

對面架船係另一間船公司架，睇來真係冇我地果架咁靚、咁大喎~

Loboc River d水係黃綠色，好似唔多乾淨咁......其實成程船都只係漫無目的咁o係條河上行，其間我地就聽住結他歌聲食lunch，兩岸景色真係冇乜特別~

哈哈，悶極搞鬼自拍~

條河原本顏色應該係咁架(下圖1)，但我調高左個暴光補償，所以出來d色翠綠左，又光左咁多(下圖2）~

架船既開動方法好得意，「船長」坐o係船後既小艇，靠架小艇推進同控制方向~

兩岸好多椰樹，都算做「椰林樹影」既~

突然見到有班「o靚仔」爬上高高既椰樹上玩，仲拋來拋去，好驚險呀！後來先知佢地既生活真係幾慘......

去到呢個「小瀑布」就要折番回程喇~

回程總算有d特別d既節目睇下，如果唔係真係悶爆！呢間小「船屋」上有幾十個當地居民o係度表演歌舞比我地睇~

傳統菲律賓歌舞表演~

竹竿舞~

佢地跳完後，仲邀請現場既遊客一齊跟住舞步跳舞同玩竹竿舞。我地都有玩埋一份！哈哈，真係幾難跳架！尤其係「扭pat」果part~

基本上佢地既表演係免費既，但如果喜歡既話，都可以打賞少少$$落「Donation Box」既，我諗佢地幾十人真係靠呢d賞錢為生。我地亦識做地donate左Peso $100比佢地~

以為表演過後冇乜特別野睇之際，又見到頭先班「o靚仔」o係樹度玩喎！今次仲表演埋高難度動作o係樹上跳落來添呀！！！

跳左落水之後，佢地就好危險咁極速遊近我地架船，之後仲爬埋上來添！原來為既只係我地既打賞~

但現場所見冇乜人有「反應」，只得小貓三四隻願意比tips呢班小朋友。我地當然唔會咁衰喇，少少地比左Peso $40佢地~

 

果刻真係覺得佢地好慘，每日都要表演呢類忙命表演N次，為既只係賺錢養家...... 香港既小朋友真係好幸福呀！

睇埋呢個忙命表演後，架船就開始靠岸喇！約個半鐘既Loboc River旅程終於完結喇！Overall來講，成個trip包餐食，仲有得玩下跳舞、睇跳水表演，都叫做有d野睇下喇~