Cebu 碧波盪漾之旅 (Day 4) - Part C

o係Loboc River Cruise「係咁耳」填飽左個肚後，一上岸司機叔叔就帶我地去下一個景點：Museum de Loboc~

Museum位置o係碼頭對岸，啡紅色屋頂既就係喇~

近睇好殘、好舊，仲有d「危樓」feel......

裏面其實冇乜野睇，得d畫作同手工藝品睇~

入口處有個counter收入場費，Peso $15/ppl，但長期冇人o係個counter，由得我地自出自入~ 但「懶」唔貪平宜既Lilian就堅持要搵個負責人出來，收我地3個既entrance fee......

好鍾意地板d磚既顏色，好classic呀！~

上一層1/F見到個好似跳舞室既地方~

老實講，成個Museum都冇乜特別野睇，係decoration幾有懷舊feel咁囉~

G/F既小禮拜堂同畫展區~

正面影Museum係最靚既，好有「殘舊美」，舊得來好像充滿故事一樣~ 呢張係我既「貼堂照」！

睇完Museum後，司機叔叔冇叫我地即刻上車，反而好「鬼鼠」咁帶我地去一間鐵皮屋度。原來，呢間鐵皮屋入面有Tarsier睇！

但由司機叔叔既舉動同鐵皮屋既環境來睇，好明顯呢度係非法飼養Tarsier既中心。d Tarsier好多身上都有wound，唔知有冇infect?! 但好明顯d職員好唔錫住佢地囉！真係可憐呀~

Tarsier中文又名「眼鏡猴」，係Bohol Island既獨有物種，受保護動物。佢地係全世界size最細既靈長科，仲細過我地隻手掌！眼大大咁，好Q、好得意架！

佢地個樣眼仔look look、好似好innocent咁，真係好可愛呢！

唔好開閃光燈影我喇~ 我好怕光架！

但有d角度又覺得佢地好醜怪，成隻老鼠咁......

好好好長既尾巴呀！

o係呢個非法飼養中心裏面，遊客可以「托」住d Tarsier任影唔嬲~ 但影完後請入番少少$落「Conservative Fund」個箱度，我地最後入左Peso $100，希望d職員會對d Tarsier好d喇！

哈哈，Lilian個樣超驚呀！因為佢好怕d「毛神神」既小動物~

探訪完可愛既Tarsier後，已經成3點鐘喇！我地今日會轉酒店，入住全Bohol Island最大、配套最完善既Bohol Beach Club (BBC)。由於怕入到去時間太晏，冇陽光影相唔靚，加上今日d行程超悶+無聊，再行落去只係徙我地時間+金錢，所以我地就叫司機叔叔直接車我地去BBC算喇！