Kenting 天氣晴之旅 (Day 1 - Part C)

我地實在係「坐唔定」一族，冇好似Silvia咁o係房裏面靜靜睇下書、休息下，反而又出左去周圍行~

由「小徑」條小路行出大街，就會見到「自立海上育樂中心」呢間舖頭，有得代訂各項水上活動，對面就係「船帆石沙灘」~

我地行左落去沙灘度睇下，個灘好細、d沙又唔靚，雖然有水上活動玩，但我地見到咁既環境當堂冇乜興趣囉~

跟住我地就漫無目的咁沿住一列既民宿一直向前行，o係地圖上見到離「船帆石」約2km有個叫「香蕉灣」既地方，係當地好出名既浮潛勝地，於是我地決定行路去~

行左十零分鐘，終於到左地圖上標示「船帆石」最邊邊既民宿 -- 「迦南美地」喇~

黃色既小屋，屋前仲有一大塊空地，真係好靚呀！旁邊藍白色好希臘feel既民宿，就係Cyrus之前住過勁讚既「伯利恆」~

過左「迦南美地」後就係一段長長既山路，沿住馬路邊行，d車o係側邊「fung fung」聲咁駛過，都咪話唔驚！

條路仲好似無止境咁，行左好耐都見唔到附近有民宿......

哈哈，o係路邊見到個好得意既路牌~ 乜d蟹會走上馬路架咩?！真搞笑~

行左成40分鐘，腳都軟埋，我地終於到達香蕉灣喇~

聽講相中呢間外型咁得意既「海灘小酒館」d野好好食架，但由於我地要留肚血戰「墾丁大街」，所以冇o係呢度食野~

海灘小酒館對面有條小路，我地沿住條小路行入去，就見到間好靚既民宿 -- 「海洋玫瑰」，一開門就可以見到seaview，超正呀！唯一缺點係地點比較偏僻，對於冇車既香港旅客來講唔係咁方便~

「海洋玫瑰」旁邊係另一間風格完全唔同既民宿 -- 「香蕉灣」，但我地倆個都覺得太「花哩look」，唔係太鍾意~

o係度望出去就係「香蕉灣」既seaview，d水真係幾清喎，唔怪得會有咁多人來呢頭浮潛喇！

突然見到遠處有「鹹蛋黃」呢！好靚既日落呀~

未睇完日落，我地就趕住行番去「船帆石」果邊。始終天越黑，行馬路邊就越危險，都係趁住仲有陽光快d上路~

夜晚7pm「小徑」老闆準時出車載我地去「墾丁大街」，佢o係墾丁街尾「New Port」遊客服務中心放低我地，約我地10pm去番原址車我地番民宿。

成條墾丁街好好好長架！！！我地o係地圖最底既地方落車，慢慢行番上去~

「New Port」遊客服務中心o係墾丁街尾，裏面有Starbucks。大家一定要認住佢呀！因為墾丁街冇乜地方有toilet，呢個商場仔入面就有toilet！之前o係墾丁影婚紗相，我o係呢個toilet換過衫，都ok既乾淨架~

墾丁大街基本上係一條大直路，馬路兩旁有好多舖頭仔同小食攤檔，只要直行唔好轉入小路，應該唔會盪失路既~

街上有好多舖頭都係賣水上用品or民族feel既衫，亦有好多賣頭飾、耳環、太陽鏡子既舖頭/攤販~

除左賣野既舖頭，街上仲有好多遊戲攤檔同呢d盲人按摩路邊攤~ 都唔明點解台灣人咁enjoy熱辣辣o係街比人按摩?！

本來諗住淨係掃小食，但同行既香港女仔Silvia就好似冇乜興趣「掃街」......所以我地決定搵間食肆食「正餐」先，之後再「係咁耳」掃下街~

行過見到呢間叫「沙哇帝卡」既泰式餐廳，聽Silvia講話網上有人讚幾好味，見佢門面又唔差，於是就決定o係度開餐喇！

由於唔想食太飽，驚一陣裝唔落d小食，所以我地3個人叫左一個「情人餐」only~ 個餐NT $600，有3餸1湯，我地3個女仔應該夠食既~

裝水既水壺同水杯都好靚呀！

飯餸到齊喇！開餐喇~

講真，d味道雖然唔錯，但香港都一定食到，如冇必要，都係留肚食d比較有特色既野食會好d囉~

餐廳入面既裝修都幾有氣氛，有興致既話仲可以o係牆上寫番句：「XXX到此一遊」添~

P.S.墾丁好多食肆/水上活動中心都會有coupon discount(http://uukt.idv.tw/ or http://www.hotkt.com/) 去之前不防睇定有邊d係Must Eat/Must Play items，print定d discount coupons旁身~

食飽飽後，我地就出發去掃街喇！

先來一塊檸檬香草雞扒 (NT $50/塊)~ 超超超好味！！！

之後，再來大大隻既燒魷魚~ 好抵食，NT $100/3隻~

仲有，點少得我最愛既臭豆腐(NT $35/條)呢！

再來串燒 x 3 more，NT $100任揀3串~

飽到頂住個胃，所以之後行經好出名既「戎將軍手工包子」都食唔落喇！

聽聞果度d包多餡又多汁，價錢唔貴，都係NT $25-$40/個，值得一試~

行出「戎將軍」後突然聽到強勁既音樂聲，跟住仲有幾個兔女郎走出來跳舞添！原來係附近夜店吸引客人既招數~

行下食下，好快就到約定時間既10pm喇！老闆娘好準時來車我地番民宿，o係車上面同佢約好左聽日包車1 Day Tour遊墾丁，10:30am出發~ 聽日一定要好天呀！！！