Kenting 天氣晴之旅 (Day 3 - Part C)

離開「旗津」後，我地就向「壽山」進發！舅舅話「壽山」差唔多係高雄最高點，可以睇到全市既夜景，好靚咁話~

架車路過「夢時代摩天輪」，識不斷變色，真係幾靚~

舅舅渣住架車不停o係山上兜，終於到左「壽山」既觀景台~

本以為會睇到好靚既夜景喇，點知都係不外如是，望多兩望已經覺得冇野好睇！香港既夜景吸引好多~

話咁快就「look」番落山，向下一站 -- 「打狗英國領事館」進發！

來到呢個等候，舅舅已經勁冇心機帶我地喇！成日顧住同「女朋友」sms，來到「打狗領事館」都情願留o係架車度，都唔肯陪我地上去參觀！當我地好奇問佢，點解呢度叫「打狗領事館」時?！佢好rude咁答：「一直都是叫打狗，沒得解，我怎麼曉得！」問下啫，洗死咩?！

我地4個香港同鄉一齊到訪「打狗領事館」，行左百幾級樓梯先上到去~

領事館紅磚牆既外表，好有英式情懷！我諗o係度影婚紗相應該好靚~

領事館既門口仲係用緊木造既大閘，好型呀！

d迴廊好有英式書卷氣色~

裏面仲有類似防空洞既地方，要蹲低身先過到去~

今日既領事館已經變左當地人同遊客既遊覽熱點，除左有Afternoon England High Tea外，仲有唔少既餐廳o係度營業~

由於領事館位處山上，亦都可以望到高雄市既夜景，感覺上o係呢度睇夜景比o係「壽山」睇靚得多！

另外，由於領事館o係出名睇日落既「西子灣」隔離，所以黃昏時好多遊客都會上來呢度睇日落！

欣賞完領事館既夜景後，我地落山搵番個衰人舅舅。佢既心情比我地上去前更差，黑哂口面咁，原來同「女朋友」鬧交...... 抵死！

跟住佢就車我地去「愛河」~ 舊年來影婚紗相時已經同Jay來過，當時已經覺得冇野好睇，今日既感覺依舊一樣~

上番車後，舅舅收到個電話。cut左線後，佢話係佢老婆打來催佢番屋企！我地當時feel到佢想點喇...... 想借「老婆」頓，早d收工番屋企抖人！

當我地要求佢帶我地去「六合夜市」時，佢又開始「咿咿哦哦」話：「六合夜市跟你們住的酒店很近，走過去就行！我又不知道你們想逛多久，沒理由在附近等你們幾個小時吧?！」

我地就話：「我地唔會行好耐，主要係買外賣番酒店食！最多咪半個鐘頭！」加上我舊年已經來過「六合夜市」，知道條食街好短，由街頭行到街尾都唔洗10分鐘！

點知條友死都唔肯，死都堅持送我地番酒店，叫我地自己「行」去「六合」慢慢逛......

果刻真係勁想爆粗囉！傍晚上車時又話我地想玩到幾夜都得，點知唔夠10:30pm已經想趕我地落車走人！叫佢車我地去夜市等半個鐘都唔得！有冇離普d呀?！

我地今晚入住既「華園大飯店」，咁岩做緊特價NT $2599/night~

酒店既櫥窗好特別，show哂d婚紗出來，原來係sales人來呢度擺酒~ 唔知o係台灣d酒店擺酒貴唔貴呢?！

大堂都幾型，好有cyber feel，成間野個格局唔似得4星~

酒店每層都有唔同既theme colour，我地被安排入住Green colour theme既6/F~ 一入到房見到面牆，我地兩個即刻爆笑！

哈哈，原來我地間房玩「低B外星人feel」~ 可能Reception Desk d職員見我地個樣低B，特登揀間岩我地characters既房！

間房都幾大架，乾淨企理！d facilities都算新淨，有LCD TV同safety lock，仲有迎賓水果送添~

最特別係個冷氣出風口，唔係o係天花板，係o係窗台，d風向上吹出來，唔會「發、發」聲吹正人地個頭！

仲有，最方便我地用來吹乾d衫褲~

拉開窗簾見到個窗都有外星飛船，朝早d陽光射入來仲會變型光綠色添！

再睇下個廁所，clean and tidy，用既浴室器具都係名牌「TOTO」~

咁平既價錢有咁好既quality都算係咁喇！

休息左陣，諗住行去「六合」搵食，點知搭lift經過商務樓層，好奇出去睇下喇！

點知見到有電腦提供免費broadband上網服務，即刻上陣網先~

呢度仲有大電視比住客免費打Wii添！！！仲提供免費蛋糕仔、coffer/tea~

極度推介大家若果來高雄可以試下入住「華園」，價錢唔係貴，但d facilities + services都真係唔錯架！

o係地圖上標示酒店位於「六合路」，離「六合夜市」唔係好遠。但原來行過去都要成10分鐘，仲要經過d冇乜人行既街~ 夜盲盲得我地兩個女仔都咪話唔驚！突然勁想咀咒個衰人舅舅！

「六合夜市」唔似台北既「士林夜市」咁大、咁有規模，得一條長街，由街頭行到街尾都唔洗10分鐘。

但呢度比「士林」乾淨衛生好多，起碼周圍都有垃圾筒比我地丟垃圾~

Cherry鍾意食鴨頭，第一時間買番件「東山鴨頭」！但我對於呢家野認真麻麻，請我都唔敢死~

之後見到間賣新彊烤串燒既舖頭，好似好香咁，就買左2串試下，誠為NT $25/串~

個老闆娘仲好好人，叫我地o係檔口扮整串燒，幫我地影左張合照！

食完串燒有d口渴，行經賣果汁既舖頭，買左杯芒果冰砂 (NT $70)同芒果泡冰 (NT$80）~

食左呢幾樣野已經飽到塞唔落，眼闊肚窄~一日最衰都係果個舅舅，帶我地去食懶抵NT $100/碟既小菜，明知我地今晚來「六合」仲係咁叫我地嗌咁多野食！

行行下竟然比我地撞番Prima佢地，原來佢地酒店離「六合」都幾遠下，要特登搭Taxi來~ 唉，我地兩pair人真係唔好彩，跟著個衰司機兼導遊，搞到我地呢兩日既行程咁唔開心，硬係有野un住un住咁！