Kenting 天氣晴之旅 (Day 2 - Part A)

今朝我地好準時10:30am pack up好哂d野，o係小徑樓下周圍影下相，就埋Silvia一齊出發去墾丁遊喇~

「小徑」橦building其實好靚架，只可惜周圍太多電線竿圍住，影極都唔靚~ 

呢隻係「小徑」養既家貓，哈哈，條尾好搞笑架，d毛比人剃到好似獅子尾咁~

同小徑老闆娘、仔仔、香港朋友Silvia合照@ 小徑Reception

出發前，老闆亦簡單咁同我地講過今日既路線：

第一站係「砂島」~

一落車就見到一大片顏色充滿層次感既大海，好想跳落去游水呢！

可惜老闆話呢個沙灘係由貝殼組成，以前d遊客來到勁冇公德心，會一包包咁偷走哂d貝殼沙，有d仲衰到拎去賣添！呢度既政府為左保護呢片海灘，已經立例遊人只準遠觀，唔能夠落去海灘lu~ 所以o係呢度暢泳既幻想即時破滅左~

雖然冇得親身落去海灘摸下d貝殼沙，但呢度就設立左個「貝殼砂展示館」，裏面有資料簡介，亦有「觸摸區」可以比我地玩下沙~ 哈哈，最重要既係呢度有冷氣，可以比我地過下冷河！

外型似公廁既「貝殼砂展示館」~

Next Station is「鵝鸞鼻公園」~

日頭入去呢個公園參觀係需要比入場費架，誠為每人NT $40~ 但老闆話夜晚來睇星星就免費開放。

「鵝鸞鼻公園」除左有出名既白色燈塔睇外，仲可以行下步道，沿住海岸線行，欣賞附近既景色~

老闆預計呢個地方我地會行好耐，所以話兩個鐘頭後番黎接我地。而事實上我地行下、影下相，兩個鐘頭真係岩岩好！ 

o係入口行入去冇耐已經見到一大片草地，雖然好曬，但感覺好舒服！

途中會見到一d賣紀念品、飲品或雪糕既攤販~

行左大約5分鐘路程，就到左燈塔喇！

燈塔入面原來好靚架，好有歐洲feel，點解果時來墾丁影婚紗相冇來呢度架?！