Kenting 天氣晴之旅 (Day 2 - Part B)

睇完燈塔，我地就開始大約1個鐘既步道之旅~

沿住步道個map由燈塔出發，一直行就會去到「海濱棧道」，o係果度可以望到一望無際既大海~ 個view超正！

著住對slippers o係呢d岩石上面行，其實好有難度架！一個唔覺意PK左，一定會爆缸！

影完相都係行番木橋穩陣d~

沿住Map上既綠色路線一直行，就會來到「親吻石」。但點睇都唔覺得兩塊石o係度kissing緊，以前d人真係好想像力！

再行前些少，就到左個叫「滄海亭」既涼亭，o係度可以眺望到墾丁既沿岸景色~

跟住個map行哂成個圈，真係用左差唔多兩個鐘頭，行到成身出汗濕哂，呢個時候「小徑」老闆就好準時咁來接我地喇~

與此同時，佢講左個壞消息我地聽，就係佢有d要事晏晝要去銀行處理，所以暫時唔可以陪我地繼續行程。但佢好好人，幫我地聯絡上舅舅(即我Blog先前介紹過人品唔掂，小徑老闆親舅舅，做司機同開民宿果位)，舅舅咁岩晏晝唔洗帶客，可以過來兜我地玩住先，等老闆晏d處理哂公務，就會來接番我地繼續行程。

之前聽Cyrus講佢上次來墾丁玩，都係租舅舅架車出去玩，仲讚佢帶得幾好添！所以我地最初都冇乜所謂，亦冇乜戒心，諗住有舅舅帶仲好，還掂之前都想book佢，係佢咁岩有客唔得閒咋嘛~

於是o係我地既同意之下，老闆帶我地去一間叫「龍磐餐飲」既餐廳食lunch，話lunch後舅舅會o係果度接我地~

「龍磐餐飲」呢間餐廳主要係賣平價既當地風味菜，主廚兼老闆以前o係5星級酒店做廚多年，「小徑」老闆大讚呢度d野食好味，仲幫我地渣主意發板叫左幾味餸試下~

餐廳好出名既「涼拌珊瑚草」(NT $150)。食落去味道幾得意，但話極度好食，又唔係喎~

食完冷盤後，仲有3餸1湯：(左) 海鮮炒麵 NT $70、(中) 雨來菇 NT $120、(右) 鬼頭刀魚炒飯 NT $70、海苔吻魚湯 NT $100

老實講，我地真係覺得味道麻麻，冇「小徑」老闆講到咁好食，可能係當地人口味同我地香港唔同啩~

我地仲叫左杯叫「養生茶」既涷飲 (NT $30/杯)，味道清清地，幾特別~

呢餐賣單誠為NT $600，除開每人NT $200，以菜色味道來計，話平又唔算好平~

食飽飽後，等左大半個鐘，終於等到舅舅來接我地！

佢首先帶我地去距離「龍磐餐飲」幾分鐘車程既「龍磐公園」，一落車就覺得有d似層相識，原來之前影婚紗相時來過呢度取景~

一落車就見到一大片草地，草皮上有好多白花仔，好似去左個mini花海咁~

路既盡頭就係墾丁既沿岸景色，o係懸崖之上，居高臨下，突然覺得畫面似層相識，呢度比我既感覺好似Great Ocean Road既shore view~

唔好以為呢度好矮，其實下面就係山崖，離地幾十米高，跌落去實死冇生~

仲有，呢度10月打後會有「落山風」，當地日描述到d風好勁，大到吹你落山都得，所以10月打後唔算係墾丁旅遊hot season就係咁解~

一年前我地就係o係呢個位影婚紗相喇~擺呢個pose時，個人就好似風箏咁，企唔穩，差d吹左落山！

影完相後，我地又跳番上車，出發去next station：風吹沙~

o係「龍磐公園」繼續沿海岸線向前行，幾分鐘就到左另一景點「風吹沙」。呢度係墾丁既特殊景點，風超大，d海風大到可以將山下既沙吹到上山既路面！尤其係吹東北季風時，仲犀利到成條路都會舖滿沙~

起初我地都覺得舅舅帶得唔錯，但慢慢地我地就覺得佢有d唔「守禮」既舉動，成日借d耳「掃背」、摸身摸勢...... 令我地覺得好uncomfortable......

但諗住佢都係guide我地一陣，晏d「小徑」老闆會來接番我地，所以我地兩個就唯有盡量黐埋d，等佢冇機會zip埋來摸身摸勢~

相中人就係「鹹豬手司機」舅舅喇！

之後，我地又去到另一景點 -- 「茶山吊橋」~

吊橋係需要收入場費，NT $10/人。其實條吊橋冇乜野睇，更冇乜特別，值唔值得比NT $10入場，就你地自己決定喇！

吊橋下面有得租獨木舟玩，但d水咁污糟，又冇景色睇喎...... 所以見佢都係拍烏蠅！

由橋上望出去既海景，海天一色~