Norway + Finland午夜太陽之旅 (Day 2 - Part B)

下面個map就係我地今日既Oslo 1日遊既行程喇！(按圖可放大)
除左去Bygdøy (比格迪半島)搭ferry同去Vigelandsparken (維格蘭雕塑公園)搭巴士外，大部份既景點都o係市中心可步行距離，都幾方便！



Oslo 1日遊既第一站，就係o係Oslo S火車站附近既「Oslo Domkirke大教堂」 ~

教堂興建於1697年，有成300幾年歷史，係Oslo既地標！
尋日我地初來報到時經過教堂，聽到銳耳既鐘聲，不過今日再去就聽唔到，唔知幾時先會播放鐘聲既呢?！

外圍既走廊好古典，旁邊有d餐廳、小店或cafe~

哈哈，被偷拍了~ 我影緊d乜?! 咪就係教堂外面個女神像囉~

 

唔知點解我覺得間教堂好有「Maryknoll」feel~ 

藍天白雲加上紅磚牆教堂，撞出來既顏色真係幾靚~

入內參觀係免費架！但記得要保持安靜喎~

裏面都幾金碧輝煌，最鍾意d金銅吊燈，唔係水晶果d咁浮誇，帶點沉實莊嚴美~

天花既彩繪壁畫好靚呀~

 

祭壇既雕塑造工仔細~



好多歐洲大教堂都有既彩繪玻璃畫，Oslo Domkirke身為挪威最有名既教堂又點少得呢~

點點蠟光提醒我地呢度係神聖莊嚴之地，唔係旅客柴娃娃既觀光點~ 薯...... Keep quiet please~

Oslo既天氣時晴時陰，10分鐘前仲係藍天白雲，無喇喇又落雨，拎把遮出來遮左無耐，又出太陽，1日N咁多次，真係比佢玩死~
今日件gore-tex又著又除N咁多次，勁冇癮呀！

參觀完Oslo Domkirke大教堂後，我地就沿住Oslo最繁華既Karl Johans Gate (卡爾約翰斯大道)，慢慢步行去另一目的地 -- Det Kongelige Slottet (皇宮)~ Karl Johans Gate係Oslo既主要街道，由Oslo S火車站一直延伸至Slottet皇宮，全長約2km，兩旁除左各式各樣既商店外，仲有Oslo既主要建築物，如Oslo Domkirke大教堂、Stortinget (國會大廈)、National Theatret (國立戲院)、Oslo Universitet (奧斯陸大學)等~

歐洲街道旁成日有d名人銅像，冇特別去考究係乜水，只係覺得d雀仔成日企o係佢地個頭上攤抖好搞笑~



Karl Johans Gate既前半段係行人專用步道，有好多街頭表演者o係度賣藝，都幾多野睇架！

呢個鼓+結他手都幾「姑寒」，一見我地舉機影佢就背對住我地，冇打賞都唔洗咁啩~

 

沿住大街直行就會見到 Stortinget (國會大廈) o係左手邊~ 好易認，見到同「匯豐」差唔多樣既石獅子就即係到左！

 

Stortinget對出仲有個公園，夏天好多當地人hea o係草地睇書、談情~ 如果香港都有咁悠閒既地方比人hea就好喇！

 

由Stortinget旁既Karl Johans Gate直望到盡頭，就係Slottet (皇宮) 所在~

果頭先熱到我地除哂褸，呢頭個天又暗哂，仲落起雨上來，短短幾分鐘，d天氣竟然可以咁大轉變！

再行前多幾分鐘，就會見到一個噴水池廣場，呢度有2隻好得意既熊仔銅像~

 

噴水池兩旁都有小朋友銅像，唔知有乜特別意思呢?！

哈哈，個名人銅像又比雀仔當凳企，仲痾左bad bad o係佢個頭度添~



好型既主人同狗仔~

公園旁邊就係Nationaltheatret (國立劇院)~

 

大街既右手邊就係Oslo Universitet (奧斯陸大學)~

見到兩個身穿傳統挪威服既女仔，有一刻衝動想埋去搵佢地影相，但又怕嚇親人喎，唯有遠遠偷影算喇~

行下影下，唔經唔覺就行到Det Kongelige Slottet (皇宮) 喇！
前後只係幾分鐘路程啫，個天又突然放晴，曬到嘔呀！係咪玩野呀?!

Slottet係1848年完工，有160幾年歷史，係現任挪威國王既住所。遊客只可以自由進出外面既Slottsparken (皇宮公園)，如果想參觀皇宮內部的話，就必須參加Guided tour，我地冇咁多空閒時間，唯有o係皇宮外面影下相算喇~

呢個銅像係以前瑞典國王Karl Johan既騎馬英姿 (百幾年前Norway都係Sweden既國土)，Karl Johans Gate就係以佢名命架喇！

皇宮門口既街燈都靚過人~



由皇宮望番落去Karl Johans Gate大街，真係一條大直路來架，其實我地都唔係行左好遠路啫~
左手邊黃色橦building就係Oslo Universitet，睇map好似好遠咁，實情只係幾分鐘路程~

 

幾分鐘前仲落緊雨要著番件gore-tex遮雨，而家又鬼死咁好太陽，即刻除左件褸放o係太陽下曬番乾先~

我地來呢度既最主要目的係睇Every Mon - Fri 1:30pm既Changing Guard~
之前o係London既Buckingham Palace都睇過換兵儀式，我亦好肯定Norway既冇人地咁大陣丈，但我地一樣好期待呀~

皇宮門口有兩個衛兵o係度註守，佢地頂帽有執毛成日漂漂下，我諗佢地比d毛「了」住都幾痕架！

1：30pm準時開始Changing Guard~
原來冇乜衛兵換班，遊客數目仲多過d士兵，但佢地都操得好齊，係幾好睇既~
 

另一樣野想讚既，係佢地d衛兵又幾靚仔架噃！