尋日初來報到時，o係travellife認識既朋友仔Gary已經show過Oslo Opera House既相比我地睇，仲大讚呢橦building勁靚~ 咁岩歌劇院距離Oslo S火車站唔係好遠，行過去都係十零分鐘腳程，我地就決定去埋果度先走！
Gary真係冇講錯，Oslo Opera House o係正海旁，玻璃幕場反映出黃昏淡淡既日光，真係好靚呀！
玻璃幕場既設計為室內帶來好多天然光，可以慳番好多開燈浪費既電力，又可以比歌劇院裏面既遊客睇到Oslo既海灣景色，一舉兩得~
可以行上去Opera House既平台欣賞Oslo既海灣日落景色 (當時已經成夜晚9:30pm都仲未日落)，不過要有心理準備好Q大風，同好Q涷囉！
對出海面上有座「岩參」既玻璃建築物，設計新穎，夠哂型格，但唔知有乜實際用途呢?！
Hea到9:30pm左右，我地就開始回程番Anker Hotel拎番d行李，拖住大喼細喼，浩浩蕩蕩向Oslo S火車站進發~
o係去火車站既途中，我地o係一個mall裏面見到呢個超「騎尼」既藝術品，實在太前衛，恕我唔識欣賞~
去到火車站個人停落來先識得肚餓，原來我地除左早餐外，都只係晏晝食左個mini hot dog咁大把，真係愛玩唔愛命呀！
喇喇林去火車站間Burger King買個set (coke + burger + chips) 誠為NOK $45，我又驚唔夠飽，另加多個burger NOK $17，一餐fast food咁就冇左成舊水港紙，來北歐d銀紙真係好似倒水咁~
開開心心拎住d行李同晚餐落月台，諗住入房開餐 (張Oslo --> Bergen火車飛原本特價NOK $199，我地extra加左NOK $850 per two person訂左臥舖房間)，點知去到月台職員竟然話比我地聽：「Overnight train was cancelled！」
What the Fuck！！！
果下真係嚇到屎林尿瀨，勁驚去唔到Bergen，駁唔到之後既行程~
問清楚職員先知道原來Oslo <--> Bergen呢段路真係有fire，所以部份路段停駛，唔可以搭一程overnight train直到Bergen，但火車公司安排左我地先搭幾個鐘頭火車去到一個中轉站，再轉長途巴士去Bergen。
雖然路途係轉折左d，但總比去唔到Bergen好，迫於無奈下我地都要接受！
但我地最關心既問題就係車費既問題喇！
喂，大佬，我地比多成NOK $850 x 2 berth carts既價錢訂左臥舖，而家被迫cancel，冇理由唔回水掛！
好在火車職員同我地保証去到Bergen火車站後可以拎得番果舊錢之餘，仲私人安排左兩卡車比我地休息~
冇錯，你地唔聽錯，係兩卡車幾十個位，其中一卡仲係first class添呀，咁我地條氣先gur番d~
呢卡車比我地任訓，雖然冇床，但都可以屈就打側咁訓到既~
P.S. 請留意座位上一包包扁撻撻既野，果包係正野來架！裏面有travel blanket、眼罩、耳塞，我地每人拎多左兩三包當補數！wakaka~
我地就係咁屈夾既環境下休息左~3個鐘頭，半夜2點幾就要落火車轉巴士去Bergen，真係慘~
沒有留言:
張貼留言