Norway + Finland午夜太陽之旅 (Day 2 - Part C)

下面個map就係我地今日Oslo 1日遊既行程喇！(按圖可放大)
睇完Slottet (皇宮)既Changing Guard後，我地就慢慢行去位於海濱旁既Rådhuset Oslo (市政廳)~



每年12月10日都會o係度舉行Nobel Peace Prize，我之所以咁記得呢樣野係因為劉曉波2010年獲得諾貝爾和平獎，但唔能夠出席，現場特登留左張空凳比佢！呢度又係免費入場，岩哂我地呢d「死窮鬼」~

 

好精緻既大鐘~

入口處有好多木雕畫，係描述北歐神畫裏面既人物~

一入到市政廳個中庭，已經比好多幅大油畫包圍住，聽講呢d油畫仲係全歐洲最大既添！

油畫變左個畫框，人同畫o係呢度可以結合埋一樣~

呢個咪係頒獎台，哈哈，等我地都扮下野先~

Van發表致辭：「多謝幾位團友跟我來北歐旅行呀！」

哈哈，我地o係度討論油畫上面果兩個係咪男人?! 係咪描述緊「斷背情」?!

 

市政廳裏面好多細微細眼野都整得好靚~

見到有人參加guided tour，我地冇錢、冇時間、冇興趣，可以慳番呢d錢~

上到2/F見到一間房充滿住好靚既壁畫，我地睇到「O」哂嘴！

2/F幾間房都各有特色，裝潢、氣派亦有不同~

哈哈，唔通呢張就係留比劉曉波果張「空凳」?!

牆上面掛左兩幅好樣衰既國王同皇后既油畫，塊面好似比人畫花哂咁既，好邪惡~

o係Rådhuset可以望到出面既海景~

參觀完Rådhuset Oslo後，我地就行番去海濱方向，o係度可以見到市政廳既全貌~

我地之所以要行去海濱，係因為沿住海岸線行大約10 mins就可以去到下一個目的地：Akershus Slott (艾克胡斯堡) ~

o係海濱有好幾間呢d船餐廳，o係架船上食野，唔知會唔會暈船浪食唔落呢?!

見到呢個Mommy拖住個想執熊bear bear既小朋友銅像時，就即係差唔多行到架喇~

嘩，夏天既Akershus Slott有一片小花o係周圍，眼前係一個好靚既畫面呢~

Akershus Slott係13世界建造既中世紀城堡，如果唔入去建築物內部參觀的話，係完全免費既，夏天時城堡仲開放至9pm添！
為左省卻不必要既旅費，我地又係選擇左圍繞城堡外圍行一圈，唔入去裏面睇野喇~ 其實裏面面積真係幾大架，我地就咁「盲中中」行都有d lost way，o係度都hea左成粒鐘架！

穿過呢道門就番到「中世紀」喇~

周圍環境綠草如茵，靚到唔識得形容！如果有時間的話，我地都好想學當地人咁訓o係草地上hea，享受下北歐既日光浴！

 

行行下去到城堡既外側，o係呢度可以睇到Oslo既峽灣景色~

面海既城牆放置左一排大炮，唔知仲work唔work既呢?!

 

城堡仲係in function架，所以仍然有衛兵駐守~

 

城堡道路兩旁都係林蔭大道，o係度閒逛感覺真係好舒服~

城堡內部可以入內參觀，但係要收入場費，費用唔平，加上就來閂門，都係周圍行下算喇~



行行下好似去左個露天表演區，真羨慕d北歐人求其搵張長凳都可以訓得鬼死咁歎！
生活慣o係繁華既香港，你比我訓，我都會覺得周身唔自在~唉，香港人，我地都係辛苦命來架喇！

附近仲有d好有異國風情既建築物~

實在太熱喇！我地頂唔順入左去Tourist Info Centre歎陣冷氣，呢度有d關於呢個城堡既書睇~

真係好羨慕北歐既小朋友，佢地既生活唔係圍繞住電視、iPad、遊戲機等高科技產品，父母一有時間就帶佢地接觸大自然，o係草地上走動，追下鴨仔都鬼死咁開心，簡單既生活幾好呀！

離開Akershus Slott後，我地就行番去海濱方向，因為要搭ferry去Bygdøy Peninsula (比格多半島)~

去Bygdøy Peninsula除左可以o係Oslo S火車站搭No.30 Bus外，夏天時仲可以乘搭o係Rådhuset Oslo前出發既ferry前往，船程約20mins，可以順便欣賞埋Oslo既峽灣景色~半島上有5間博物館：Norsk Folkemuseum (挪威民俗博物館)、Vikingskipshuset (維京船博物館)、Framhuset (佛拉娒號博物館)、Norsk Sjofartsmuseum (挪威海洋博物館)、Kon-Tiki Museet (康提基博物館)。渡輪有兩個站，如果想去前兩個博物館的話，就要o係首站「Dronningen」落船；想去後面果三個博物館參觀，就要o係第二個站「Bygdønes」落船~

由於時間有限，我地去到時都好晏，所以只夠時間參觀Vikingshipshuset呢一間博物館咋~

上渡輪既碼頭就係Rådhuset Oslo對出既海濱~

 

 

來回船票NOK $40~
呢度係兩sets船票，去程會沒收左一格，記得keep好回程果一格船票呀！
 

 

點解我地唔搭巴士揀搭渡輪，都係為左可以順道欣賞Oslo既峽灣美景！相中既castle就係我地岩岩參觀完既Akershus Slott~

 

 

藍天白雲，下午既天氣唔錯呀，比上晝穩定得多~

 

經過大約20 mins船程，終於離遠見到Bygdøy Peninsula既Framsuset (佛拉娒號博物館)~

 

我地o係渡輪既第一個站「Dronningen」碼頭落船，但唔係一落船就可以即刻見到博物館架，要行左~10 mins先去到Vikingskipshuset (維京船博物館)~ (按圖可放大)

呢度就係Vikingskipshuset喇！

 

 

 

入場費都唔平架，要成NOK $60/person~
Celia尋日早過我地成日到埗，所以佢有時間來呢間博物館參觀，不過佢就話裏面得3架維京船睇，唔值咁貴~但山長水遠來到，冇理由唔睇下挪威出名既維京船架嘛，貴d都要見識下架喇！Celia就o係博物館外面休息一陣，等我地參觀完先繼續行程~

呢個就係維京船既船頭裝飾，雕工好仔細呀！

博物館果真如Celia所講好細，只係展示左3隻維京船，同埋一d維京時代既生活用品咁，行哂咁多個展館都唔洗5 mins，仔細d睇下、影下相咁，預30mins一定夠！

呢隻就係3隻維京人船之中最大隻既Oseberg號，建造於公元800年左右，好難相信1200年前d人既造船手工已經咁好！佢地唔止用木材整左隻超大既船出來，船身仲有好多好靚既雕刻裝飾，真係不得不讚下古代既維京人！

 

 

就咁影相好難想像到Oseberg號有幾大隻，睇下Sammy同GiGi拍埋去即刻變左「豆釘」咁就知有幾犀利！

 

除左可以o係地面欣賞呢d維京人船，博物館仲有幾個高台比人從較高處觀嘗船身既內籠，真係唔睇都唔知船裏面原來係咁架~

除左Oseberg號，仲有另外兩隻維京船，其中一隻已經爛左一半~

 

 

館裏面仲展出維京時代既生活用品~

好快就參觀完成間博物館，出番來門口既小食亭會合番團友Celia~ 今朝早暴食完個豐富早餐到而家都未有野落肚，而家成5pm係時候食番個late lunch架喇！


 
o係小食亭買左個hot dog，NOK $30一隻熱狗，北歐既生活指數真係好嚇人呀！

 

 

食飽飽就繼續行程喇！Celia話可以由Vikingskipshuset行去Framsuset (佛拉娒號博物館) 果邊，唔洗再等搭ferry咁麻煩，大約行左20 mins就到喇，都唔係好遠啫~

去到Bygdønes碼頭呢面，o係Kon-Tiki Museet (康提基號博物館) 門外就會見到呢個假復活島石像~

呢橦咁特別兼eye-catching既三角形建築物就係Framhuset，可惜我地行到去時已閂左門，無緣入內參觀~

 

 

既然呢度既博物館都閂哂門，都冇乜特別野睇lu，我地決定打道回Oslo市中心，繼續我地未完既行程~

去到碼頭仲未有船，我地唯有o係岸邊周圍影下相~

 

對面就係Oslo喇~ 我地仲見到耶穌光呀！可能Oslo果面岩岩落過下雨吧?！

o係寂靜岸邊談情既情侶，情到濃時kiss kiss，好romantic呀！呢刻突然覺得自己丟落Jay o係香港好似好衰咁喎......

岩岩先見到耶穌光，轉頭落完雨就出彩虹喇~