Kenting 天氣晴之旅 (Day 2 - Part C)

離開「茶山吊橋」後，我地就向「出火」進發~ 途中竟然比我地發現到一片野生既花海！超靚呀~ 即刻跳落車影餐飽！

呢片花海既確實地點我地並唔知道，只知道o係茶山-->「出火」既途中就會見到~

呢個客運站牌寫到咁，突然令呢個地方添加靈異氣氛~

「出火」之所以會咁神奇有火出，係因為地下天然氣不斷冒出燃燒。日頭呢度冇乜人，反而夜晚就會聚滿遊客，大家會o係度放煙花、燒爆谷~

我地來既時候完全冇遊客，但就見到個賣「薈番薯」既攤檔，個老闆娘仲大講鬼故添！

佢話而家d火係橙紅色，燒出來既番薯先食得~ 到夜晚時分，d火就會變成綠色，果d係鬼火來架，到果陣時d番薯就唔食得，唔可以賣比人！講到似層層咁......

後來，舅舅同我地講話呢度夜晚鬼咁多人，邊鬼度有綠色火丫！我地先知個女人係呃鬼食豆腐~

離開左「出火」後，我地就去到「恆春古城」~

古城入面有四道保存得好完整既城門，分東、南、西、北，由紅磚切成， 聽講係清朝時建造既！

北門

o係北門側邊展示左架坦克車~

我地仲去左「恆春鎮石牌公園」，但呢個公園完全冇野睇，感覺有d徙時間......

呢度有個叫「澄心亭」既涼亭~ 本以為行到上去可以見到成個恆春古城既景貌，但由於周遭既建築物太高，乜鬼都睇唔到，徙哂我地d腳骨力~

南門

之後，舅舅帶我地去買城內出名既小食 -- 綠豆饌。呢個小食有d似我地既綠豆沙，又係有涷/熱食，但d豆咬落去比較爽，味道亦冇綠豆沙咁甜~ （熱 NT $25 / 涷 NT $30)

外賣左杯綠豆饌上車，因為舅舅趕住去接番佢今日book左佢車既客人。佢之前放低左pair客人o係「海生館」遊覽，先「zip」到時間來帶我地去玩，而家夠鐘要去接番佢地~

與此同時，我地就開始好擔心...... 點解「小徑」老闆仲未有聲氣話來接番我地既?！我好唔想再跟住個「鹹豬手」舅舅去玩喇！仲有，舅舅架車係5人車，我 + Cherry + Silvia + 舅舅已經4個人，再加多2個點坐得落呀?！

呢度就係國立海洋生物博物館，又名「海生館」，係全台灣最大規模既海洋生物館。裏面既遊覽面積好大，冇番幾個鐘頭都玩唔哂，有d似香港Ocean Park既海洋世界，加上入場費都幾貴 NT $450/人，所以我地由始至終都冇打算來呢度玩~

終於o係墾丁見到帥哥喇！成個憂鬱小生咁~

來啦，錫啖先！

o係「海生館」等左無耐，就見到舅舅pair情侶客人出現喇~聽佢地講廣東話先知道原來佢地都係o係香港來玩架！

佢地見到我地3個女仔坐o係舅舅架車入面都好odd，明明佢地今日係包左舅舅架車架嘛，點解會無端端多左3個閒雜人o係度?！佢地亦拉左舅舅埋一邊，「嘈」佢，要佢比個交代！但舅舅只係拖住佢地話：我識做架喇！價錢方面有得再傾！

就o係呢個時候「小徑」老闆打來話佢搞掂哂d野，可以來接番我地，但接電話既舅舅話佢帶多3個客都冇問題，可以繼續帶我地，仲叫老闆放心將我地交比佢添！

Oh, my God！我地兩班人，本來pair情侶係2人包車、我地就3人包一架車，而家變左5人（連埋舅舅就6個人)迫o係架5人車度，價錢點計先?！ 但舅舅一直用「拖字決」，死都唔講價錢點計......我地又同pair香港情侶(淨係記得女仔叫Prima）未熟落，所以當時都冇得一齊商討對策，唯有局住繼續行程......

下一站我地來到「貓鼻頭」~

舅舅介紹話呢度有舊石頭好出名，個樣好似一隻蹲o係地下既貓，尤其係個頭最似咁話喎~ 我地就覺得唔係好似喇！唔知大家睇唔睇得出呢?！

睇完貓鼻後，我地就出發去「後壁湖」食魚生喇~

「後壁湖」係當地既潛水熱點，亦係出名既漁港，漁獲豐富，所以d魚生都好美味架！

往「後壁湖」途中路經一個浮潛點，唔知點解，我直覺話比我聽呢度冇乜魚睇~

到左「後壁湖」既「恆春區漁會大樓」喇！果度泊左好多漁船，現場有船家o係度同市場入面既舖頭交收緊~

哇，唔知呢條魚大哥高姓大名，淨係知道佢超大！大過我隻slipper好幾倍~

行入去就見到一列既「平價」餐廳~ 究竟有幾平呀?！舅舅好似有相熟舖頭去開，一入去就帶我地去左檔叫「阿興」既舖頭坐低，冇得試食Bloggers大讚既「輝哥」魚生添~

「阿興」d魚生睇落都幾新鮮架！興哥切魚生既手勢亦好純熟~

你地估下咁大碟魚生賣幾錢?！

答案係：NT $200 only~ 即係around HKD $50咋！香港邊度有咁平呀?！

舅舅推介我地試飲呢隻叫「珊瑚海燕窩」既飲品，話味道真係有d似燕窩，仲係「體內環保清道夫」添~

舅舅又叫我地試食呢種海草，話好好味架喎！但我見個賣相咁...... 最後都冇食到~