沖乾淨涼後，執番靚個樣，我地就出去搵食喇！
「Beach House」位處「南灣」最熱鬧既位置，所以行出去已經有好多食肆選擇~尋晚個衰人舅舅臨走前約好左今日5pm會來「Beach House」pick up我地，所以我地仲有幾個鐘頭時間可以周圍行下！
附近有泰菜、意大利菜，仲有「戎將軍」，但我地最後揀左食「老鄧牛肉麵」，貪佢價錢平，又大碗，夠抵食！
我點左碗「牛肉冬粉」，Cherry點左碗招牌「牛肉麵」~ d牛肉真係整得好入味，d湯又香濃，值得推介！
哈哈，店內仲有字畫講述食牛既好處！
食食下，見到大隻老闆同幾個後生仔玩「咬手瓜」，哈哈，估唔到老闆一把年紀都仲咁玩得！
老闆真係好大隻呀！幾十歲人仲有胸肌架，Fit過好多後生仔！
食飽飽後，行過有舖頭賣「萬巒豬腳」，係呢度好出名既食品，好多食肆都有賣，好奇心驅使下我地又再次出動搵食！
Cherry就對呢種土產讚不絕口，密密食唔停口，我就覺得麻麻，因為個口感有d似我地食開既燒肉，食得多有d膩......
食飽後最岩就係散步做下運動，我地沿住map上既「大斜坡」一直行，o係map上個大斜坡距離好似好短下，點知行極都行唔完，行左大半個鐘都未到「飛球場」，根本完全唔合比例既！
途經特別又靚既民宿，我地都會停低影下相~
行左差唔多45分鐘，終於到左「哈利波特草地飛球場」~
之前o係澳洲都玩過一樣既野，o係澳洲就叫Zorb Ball，玩者要被縛o係一個大膠波入面，o係山坡上「look」落來。o係澳洲玩「look」一次要成AUS $40，但o係呢度玩就平好多，特價NT $189/round，兩人同行仲平，NT $340/round！
可惜Cherry著住裙唔想玩，我又唔想自己一個玩咁戇居，所以齋睇冇玩~
然後我地又行番去「Beach House」攤抖下，等舅舅5pm來接我地~
同老闆娘Joyce合照~
Joyce同大隻佬老闆都係超爽快、又唔計較既人，
o係等舅舅來接我地既時間，佢同我地傾左好耐偈。當佢知道舅舅「獅子開大口」收我地咁多錢時，佢都凳我地唔抵，仲建議我地下次來墾丁玩可以自己租車，抵玩好多咁話！
總括兩間民宿既服務態度同quality，我覺得「小徑民宿」裝修靚d，但就比較重商業味道；
反而「Beach House」就比較像外國既「B&B」，民宿主人性格隨和同open-mind得多，感覺佢地真係當我地係朋友看待~
已經5:15pm喇，舅舅仲未「浦頭」，Joyce幫我地打電話去追問佢既行踪，佢竟然話要5:30pm先來到~ 遲到means a poor beginning of the evening trip......
結果要等到差唔多5:45pm舅舅架車先出現，呢個時候再見番Prima佢地，急不及待問佢地今日既行程安排成點樣?！
舅舅有冇黑面等?！
佢地話舅舅今日扮哂冇野咁，帶左佢地去我地尋日晏晝visit過既景點，仲帶佢地去玩浮潛，但就好明顯冇尋日帶得咁有心機，同咁多野講~ 哈哈，我地覺得咁樣仲好，唔洗成日聽佢講埋d衰野/有味笑話！
後記：後來Prima發現佢地個銀包唔見左NT $3000，除左浮潛時放左o係舅舅架車度外，佢地個銀包都一直冇離過身！
係咪有人手腳唔乾淨就唔知道喇！
我同Cherry一上車舅舅就懶好人咁話：「昨天不開心的事大家就不要記著，最重要是今晚大家玩得開心！你們想玩到多晚都行~ 就算想玩到1、2am都沒有所謂，最緊要是你們玩得開心！」
後記：玩到10:30pm佢已經迫不及待送我地番酒店，「喇喇林」收錢走人！
呢條友講野真係信唔過！
去高雄途中見到好靚既日落，即刻爬上車頂影低佢~
舅舅話我地玩左成日一定好肚餓，帶我地去「旗津」開餐先，佢話果度有間食肆叫「萬三」，NT $100一碟餸，出哂名又平又好味咁話！
去到「萬三」真係見到人山人海，多人到要等位先有得食。呢度有d似香港既大排檔，又係冇冷氣架~
舅舅等到有位後就坐左o係度唔願郁，我地又唔係當地人，點知d野食點叫法?！又唔知邊樣好味喎！
但舅舅死都唔肯同我地一齊出去，黑哂面咁，淨係叫我地自己去揀野食，仲話嗌NT $800應該夠食咁話！
呢度叫餸食既方法有d似快餐店，先去售票處買飛，分NT $50或NT $100面值，然後用飛仔去換野食~
有好多餸揀，款款都好似好好味，真係花多眼亂！
我地當然冇咁傻，跟舅舅所講嗌NT $800野食喇，因為仲要留肚夜晚去「六合夜市」開餐丫嘛~我地4個人加埋嗌左NT $550野食，4餸1湯，都好豐富下！而且，呢度白飯任裝、生果任食、茶水任飲，唔怪得咁多當地人來開飯喇~
除左條魚要NT $150外，其他真係碟碟NT $100！雖然價錢係好抵食，但山長水遠來台灣，冇理由食d香港都食到既野架嘛，緊係要留肚食d地道野架喇！但舅舅就好似好唔likey我地嗌咁少，成餐黑哂口面咁！喂，大佬，我而家免費請你食飯，仲咁多要求?！你份人人品真係好差下喎！
食完飯後，應我地要求，舅舅順道帶我地去「風車公園」睇下。原來夜晚既風車公園冇乜野睇，d風車又唔識郁~
the food seems very delicous, why the people u called 舅舅 havent appear in the pics. want to see his " look" ma.
回覆刪除戎將軍係由大肥佬藝人戎祥開的店, 佢地好慘呀, 生意俾"小杜包子"搶左好多, 坤哥同我地講其實佢覺得戎將軍仲好食D, 不過小杜包子多電視節目介紹, 佢覺得不外如是!
回覆刪除我地原本黎今次都諗住租車架, 但係礙於上次我地飲酒飲得好盡興, 為免今次為駕車而負責駕車果個無得飲酒, 於是又改番包車喇, 不過今次十一人無得搵坤哥架車, 我地試一個新o既, NT$6000/day, share with 11 person, touchwood, 希望唔好遇到個好似你地位"舅舅"咁啦!
回覆刪除