Sabah 上山下海之旅 (Day 2 - Part A)

超早的Morning Call

第二朝6點幾，電話就響起！

當堂「頂！」左聲~

呢個乜野豪華團黎架? 8:30am出發，6點幾就morning call，唔洗休息架咩！

我地o係張床度hair多半粒鐘，就無奈地企身刷牙、洗面、化妝、Gel頭、執去沙灘要帶既野，跟住就落去酒店餐廳食早餐。

o係我地間房望出去，係無敵大海景~

餐廳既露天茶座有無敵大海景，加上藍藍的天，白白的雲，

o係度食早餐心情特別寫意~ 餐廳既早餐都幾多選擇，最好味既係唔同味道既包包。可惜，我地得20分鐘去享用呢個早餐......

仲有，露天位原來好多蚊架！

同雨點玩遊戲

8點半正式出發去Sapi Island！

我地等著同陽光玩遊戲等到頸都長埋呀~

坐住快艇，唔洗15分鐘就到達Sapi Island lu，但係呢個島比我地想象中好似細左d喎...... 海岸線仲短過蝴蝶灣......

Tour Guide首先安排我地去海邊既露天餐座settle down，坐低聽水上活動agency既staff講解各樣活動既收費同時間。個staff好靚仔，有d似F4~

哈哈...... 搞到我地淨係顧住昅佢，冇乜心機留意佢講既野添！

細心一聽，原來d水上活動收費真係幾「溶」！Compare with泰國or浮羅交怡，貴到我地滴哂汗......

水上電單車(Jet Ski) ==> 每人RM 150，玩30分鐘 水上降落傘(Parasailing) ==> RM 80(單人，玩10分鐘)                         ==> RM 160 (雙人，玩15分鐘) 香蕉船 (Banana Boat) ==> 每人RM 30，玩10分鐘 飛魚 (Flyfish) ==> 每人RM 60，玩10分鐘 海底漫步 ==> 唔係好記得，好似係around RM 250

但係一場來到，無理由唔玩架嘛！「肉赤」地

比錢玩水上電單車同水上降落傘，誠為RM 230 = $500 HKD，加埋黎Sapi Island比既tour fee $300 HKD，淨係呢個朝早已經洗左$800喇！So expensive~

正當我地準備出海玩水上降落傘時，忽然天色大變...... 風很大，天上的雲變黑了，小雨點打到我地既頭上......

頂！落大雨呀！！！

暫時出唔到去玩水上活動，唯有拎個mask同snorkel，著埋救生衣落水玩下浮潛先。但係原來淺水位都幾多石頭，所以我地就問Tour Guide有冇蛙鞋?

點知佢勁冇禮貌咁答我地：「冇架喎！石頭怕乜啫！要蛙鞋要比錢架喎！」

Lilian：「點解要比錢呀? 個團唔係包左浮潛儀器架咩?!」

Tour Guide Edmond：「冇點解喎！」

....................... 從未見過咁串既導遊！激死人喇！

潛左陣都唔覺有乜魚，於是Lilian同Cyrus就上岸搵導遊拎麵包(麵包係免費供應既)，諗住用來喂魚仔。點知我地o係個tour guide前面企o係度討論拎麵包既事時，個tour guide都唔識「醒水」即刻拎比我地，

仲扮哂聽唔到咁，要我地開聲問佢拎，佢先「膚顯」地比幾塊我地...... 今時今日咁既服務態度真係好唔要得！

谷鬼氣落番水繼續浮潛...... 應該話係「浸」水先岩！

呢度d魚一d都唔colourful既，多數都係透明or白色。仲有，唔知點解呢度冇乜魚，

係呢度根本少魚丫，定係天氣唔好d魚仔走哂，定係我地嚇走哂d魚仔呢?!

雨越落越大，水上活動根本無法進行，我地「齋」浸o係水度成3粒鐘......

除左喂下潦潦可數既幾條魚毛仔外，我地可以做既就係用防水相機影下相、講下隔離果班日本妹既壞話(哈哈，o係正佢地執邊講佢地壞話+讚佢地身材好，佢地又唔知道你講緊佢，真係幾搞笑！)

、同埋講下一pair極度痴纏既團友既壞話外，其他既就乜都做唔到！

好凍呀~ 唔想再浸喇！

但係而家落緊雨，上番水面會仲凍，無奈地要繼續浸到皺哂皮為止，直到tour guide叫我地上番岸食lunch。話就話係「海鮮BBQ自助餐」，實情就係d凍哂既「到會」野食，

d蝦同d蟹都係又凍又硬，比左$300 HKD來呢個島比d咁既野我地食，當我地係白癡咩!!!???

食完野天氣情況仲未好轉，又差唔多到回程時間，睇來都係玩唔到水上活動架喇，我地當然要追tour guide「回水」喇！點知唔問由自可，一問真係頭都想打爆佢！！！

Tour Guide：「各位團友，而家有兩個plan，二選一，就係

1. 而家唔退番錢，我地後日上晝再出海玩番呢d水上活動，晏晝就去紅樹林睇長鼻猴同熒火虫，但係咁樣既話，我地後日就去唔到"神山"架喇！

2. 而家退番錢，聽日如期去激流，後日如期去神山，但係就冇得玩番水上活動同去紅樹林。」

我地當堂打左個突！！！

乜野後日晏晝去紅樹林呀??????

乜唔係包左架咩???

乜唔係今日晏晝去咩??? 點會話後日去神山就冇得去紅樹林呀?????? 搞到我地頭都暈埋！

唔知佢up乜叉野~

Tour Guide：「今日晏晝去果個紅樹林同我地後日去果個唔同架！今日果個就係團費包左既，後日既要自費。」

我地：「下???

有乜唔同呀? 今日果個唔係去紅樹林睇長鼻猴同熒火虫咩?」

Tour Guide：「唔係，今日係去紅樹林遊船河，冇長鼻猴同熒火虫睇，同後日果個唔同架！後日果個好值得去，會係傍晚出發去睇熒火虫，d熒火虫好似聖誕樹咁閃閃下，好靚架！」

我地當堂感到被「昆」了！！！

From the beginning，呢個Tour Guide完全冇講過紅樹林有兩個，淨係不斷咁講紅樹林有幾正！等我地以為今日晏晝係去紅樹林睇長鼻猴同熒火虫添！呢個moment，我地好想@$#$#$#&%*個Tour Guide！！！

如今之計，我地緊係拎番哂d錢先喇！仲決定聽日同後日都唔跟團，自己join local tour！從未試過跟團咁谷氣架！