Sabah 上山下海之旅 (Day 4)

因為旅行社既自費項目太過「lur水」，所以我地除左尋日既神山團冇跟旅行社去玩外，今日既rafting都係自己join local tour！

Sabah有兩條可以玩激流既河流，分別係近d既Kiulu River (2級)同遠d車程既Padas River (3級)。睇網上評價，Kiulu River Rafting似漂流多d，我地當然想玩激d既Padas River Rafting啦！

旅行社報價3級Padas River Rafting要HKD $512/head，我地自己搵local tour先係HKD $352/head，每人慳左成HKD $160呀！可見旅行社食水幾深先得架~

又係晨早出發，先搭1.5hr旅遊巴去到一個幾荒漠既火車站~ 之後會轉搭百年歷史既火車到達rafting既起步點！

話明係百年歷史，即係又舊又冇air-con囉~

等左成個鐘頭架車都唔開，又熱又焗，又唔知發生乜事喎！

我地又唔敢謬謬然落車行下，怕突然開車既話唔知點算~

極度八卦既Lilian抵受唔住悶熱既車箱，行左出去抖下氣！

咁岩架火車上有「東X遊」既領隊帶d團友來玩激流，Lilian就打聽下發生乜事架火車遲遲唔開啦?！

原來呢架老爺火車成日壞車，今日又突然「跪低」，搶修中！

等左成兩粒鐘，架車終於開動啦~ 全車人都好興奮呀！！！

我地坐「indoor」位，當地人就坐「outdoor」既floor seats~

Lilian跳過火車之間既junction出左去涼爽d既「outdoor」floor seat坐~

膽粗粗既我又想出去「outdoor seat」體驗下，點知跳番入車箱時驚到腳都震埋！

其實真係幾terrible架，車箱之間條隙都幾闊，如果跳唔過，跌左落去，再來架火車卡轆過既話，真係「係咁先」~

搭左成個鐘頭火車，差唔多到達Padas River既起點啦！

d河水好泥黃色，好似好污糟咁喎~

幾經轉折終於到達終點啦~ 開始我地既Padas River Rafting啦！

我地帶左防水相機去，所以旅程中可以影相留念呢~

唔知係rafting centre既人有心定無意，我地3個被編入全Asian既boat上！成船人除左我地3個，仲有兩個姐手姐腳既日本妹，同一對同樣來自香港既情侶，加埋帶領我地船伕，總共8人一船！

唉，眼見其他船上都係大大隻既鬼佬，我地就成船人「un挑鬼命」，都預左划得好辛苦架啦~

旅程中每次經過d急流位都好刺激，好好玩，驚死反艇咁~

去到冇咁急流既地方，仲可以比我地落去遊下水，隨水漂流添~

呢次旅程雖然划得好疲倦，但真係玩得好開心呀！

短短個幾鐘既rafting trip完結後，我地就去左rafting centre既屋仔換番d乾衫，食埋個難食既BBQ lunch後，我地就搭巴士回程番去酒店~

番到酒店沖乾淨涼後，我地就搭Taxi去番尋晚去過既waterfront搵食！

經過見到呢間餐廳好似幾好feel咁，揀左個outdoor seats，望住海景享受我地既海鮮大餐！