Sabah 聖誕碧海藍天之旅 (Day 3 - Part A)

好在尋日去美人魚島玩水唔係太倦，如果唔係今朝實起唔到身去玩rafting~今朝既集合時間係5:20am，喇喇聲o係房咬左香港帶去個蛋糕後，我地就仆落樓！記得幾年前去玩時都好似都洗咁做架喎，唉，天都未光就要出發去玩，一上車已經大昏迷~ Zzzzzz......

出發前我地都唔知travel agent幫我地訂左邊間公司架，淨係知道「Riverbug」係當地最大既激流公司，最有經驗同設備最好既，當tour guide帶我地上尋日搭果種大旅遊巴，見到車身有「Riverbug」字樣，即時放心哂！

經過2個幾鐘頭既車程，終於來到Beaufort保佛火車站喇！

我地架旅遊巴早左到，tour guide話仲有45分鐘先夠鐘上車，火車站豆腐潤咁細，冇野睇，悶到嘔呀！2005年來過玩rafting，知道等陣搭果程火車唔會有toilet，所以特登比RM $0.3 o係火車站個公廁去左先，臭都好過要忍粒幾鐘丫嘛~

個Beaufort火車站真係勁細，一眼睇哂，後面就係月台~

 

火車站有列車班次時間表，但d火車成日都壞，我諗都好難跟得足架喇~

差唔多夠鐘，見d乘客開始行去月台，我地都一於唔執輸，廢事一陣爭唔到位坐，要企成粒幾鐘呢！

你睇下我地坐果個位側邊係爛架，可想而知架「老爺火車」有幾殘！

 

呢程火車都幾長途下，由Beaufort去到玩激流既終點站「Pangi」約要個幾鐘車程~

行左冇耐就開始見到Padas River既景色，Jay好驚訝咁問我：「Guide book話係white water rafting，點解d水係泥黃色既?！」
冇錯，呢度d水係「黃咁咁」架，所以千祈唔好著白色衫落水，除非你唔想帶件衫番香港喇！

坐左大約45mins後，架火車就o係一個大站停左落來，全車人落哂車。以為到埗喇，點知原來係轉車咋！又要繼續再「凳」過呀~

車站對面有d傳統馬高腳屋，好簡陋的家~

原先果架火車頭先跟車身脫離，然後兜個灣再勾番住火車卡回程，我地就要等下一班火車轉駁去rafting終點站~

上左接駁既火車後就繼續我地既旅程喇，大約30mins後架火車又再次停o係一個叫「Rayoh」既站度，今次睇怕到站喇啩！
點知......Tour guide話我地有10mins o係呢個站個toilet更衣，同放底哂自己既隨身行李，動作要快，只著落水既裝束再次踏上火車，向終點站「Pangi」進發~




Travel agent一早remind左我地唔好著拖鞋落水，驚整損腳，所以我o係香港帶左對私伙潛水boot來，Jay就買左對「白飯魚」來，著完就掉左佢~

 

 

呢段最後尾既路程，可以近距離見到我地一陣會玩果段激流既路，睇落有d位置既水流真係幾急咁喎~

又過多25mins既車程後，凳到pat pat都痛埋，終於真係到左「Pangi」站 -- Padas River Rafting既起點喇！！！

落車行幾分鐘就見到「Riverbug」既大本營~

Riverbug既職員o係度bomb緊d rafting boats~

未有咁快開始住，職員先派左d水比我地飲，但d水樽上寫住「Treated Pipe Water」，搞到我地都唔知飲唔飲好......

跟住仲有生果派發添~ 但我地為左安全計，唔想未玩已肚痾，所以冇拎到來食~

冇耐仲有職員拎住一大堆橡根出來，原來係幫帶眼鏡既團友整眼鏡cool~ Jay都有整呢，真係好實正架！

 

見仲未開始briefing，我地就周圍影下相~

 

之後coach就開始做briefing，先講解點渣支paddle，再講解o係rafting boat上唔同人、唔同位置既正確坐姿~

 

之後又教我地如果跌左落水，點樣爬番上隻艇度~
呢樣skill好重要，因為玩既途中就算唔反艇，都會有d水流平靜既地方可以比我地跳落水玩，玩完後點上番架艇度原來都有橋妙架~

最後係如果touchwood真係上唔切艇，浮左開去，佢地都會有staff坐住kayak負責沿路「執雞」既~ Coach就教我地點樣可以運用隻kayak去幫我地「自救」！
哈哈，呢招真係勁有用！事關唔熟水性既Jay最後真係有機會可以practice到~

 

上完堂後，我地就去揀裝備喇！先揀合身既safety vest先，再揀頭盔~
話就話d頭盔有分size，但我就試來試去都唔覺得有岩我咁細既頭型既，搞到一陣玩果陣成日比頂野遮住左對眼~

 

準備就緒，coach就幫我地分組~ 上次來過玩都知道佢地會跟國籍將我地分組，鬼佬同番鬼佬一group，亞洲人會同番亞洲人一條船。
我地被分到同另外兩對Malaysia couples同艇，兩位馬拉男士被選為打頭陣坐船頭既「先頭部隊」~

出發前先影張大合照~ (呢張相要玩完之後買CD-Rom先可以得到)